un omaggio a questa bella terra e a questa bella gente

[ZioBenny]

NO, SICILIANI !
CANCIA LA SORTI SI VUI LU VULITI

No, siciliani,
nun appartegnu cchiù a ‘sta razza,
nun appartegnu cchiù a ‘sta genti,
ca lassa fari;
sta genti carcirata
fora di l’ Ucciarduni,
chi sinni futti
e ca nun s’incazza.
No, siciliani,
nun appartegnu cchiù a ‘sta razza

di carcirati,
di genti addurmisciuta
ca nun prutesta
e ca si fa ammazzari,
ca s’accuntenta
senza parlari,
‘sta genti sciapa,
‘sta genti pazza;
no, siciliani,
nun ppartegnu cchiù a ‘sta razza

Chi campi a fari
patri disonoratu
quannu ti morsi un figghiu
e cu’ ti l’ ammazzò
‘u ‘ncontri tutti i iorna,
‘o bar, ‘nta strata,
vicino a’ scola media
e ‘ntà putìa?


Patri vigliaccu,
chi campi a fari
quannu ti morsi un figghiu
o ca ‘mpazziu
pi’ chiddi ca ci dettiru ‘u vilenu,
ca ‘ncontri tutti i iorna
‘nto’ risturanti ‘i lussu
e ‘nta’ l’ albergu,
‘nta’ l’apparecchiu ‘i Roma,
c’’u cudazzu
di tanti liccaculu
di palazzu.

No, siciliani,
nun appartegnu cchiù a ‘sta razza
di patri ‘i merda
ca stannu zitti
inveci di parrari:
patri di merda
e chi campati a fari?

Terra di carcirati ‘sta Sicilia,
chi stannu tutti ‘i fora
‘i l’ Ucciarduni,
di pupi morti,
spugghiati di curazza;
no, sicilini,
nun appartegnu cchiù a ‘sta razza!

Nun appartegnu cchiù a ‘sta razza!
Pi quattru sordi ‘i merda
t’’a vinnisti
‘a vita di to’ figghi;
ti la vinnisti
‘a terra di’ to’ avi;
ti lu vinnisti
l’ unuri e ‘a lialtà
ch’era la forza
d’’a sicilianità.

E’ cchiustu lu to’ sbagghiu:
pirdisti lu cunsenzu
d’’a “genti ca’ nun parla”,
comu lu brigatista
ch’era l’ eroi
e dopo addivintò
‘n “ammazza boi”.
L’ unici ca ci ponno
su’ i carusi
o i picciotti,
chiamali comu vo’;
Sunnu ‘i Palermu,
‘i Catania e di Missina;
sunnu ‘a spiranza,
beddi comu ‘u suli,
libbiri, seri,
studenti o muraturi;
sunnu ‘a spiranza,
sunnu ancora ‘u Vespru,
onesti, chiari,
ch’’un vonnu accittari
‘stu munnu i merda
ca ci vonnu dari

Iddi sì ca su’ forti,
muraturi o studenti,
e si sfidanu ‘a sorti,
li chiami ‘ncuscienti?
Picciotti, ‘nsurgiti
ch’ogni cosa putiti
e quannu chiamati
pi scinniri ‘nta chiazza,
sciunnu subitu a diri
CH’ APPARTEGNU SI' A ‘STA RAZZA,



ca si seppi lavari
la lurdura ‘nfamanti
di mircanti di morti,
assassini d’infanti,
chi d’un jardinu
ficiru un disertu,
chi di la Grecia
passaru ‘o mediuevu;

cà si scurdaru
‘i Verga e di Brancati,
Fidiricu sicunnu,
Quasimudu, Eschilu,
Martinu, Antunellu,
D’Alcamu,
Capuana
E Pirandellu:



Di l’ artisti di oggi
nun ni parlu; e mi urta
‘u silenziu chi dici
ca si cacanu ‘i sutta.
E si ‘sta filastrocca,
ca scrissi in lingua antica,
c’’a rima in settenari
p’essiri cchiù capita,
vulissiru firmari
(cosa ca pari pazza)
mi mittissi a gridari
ch’appartegnu a ‘sta razza.

[Nicheja]

Bedda puisia ppi daveru.